Gjertrud Jynge

Etter utdanninga var ho først knytt til Rogaland teater, men har vore knytt til Det Norske Teatret sidan 1996. Ho har hatt berande roller i ei rekkje dramatiske, humoristiske og musikalske teaterframsyningar. Mellom større roller er Milja i Ungen (1997), Josefine i Bør Børson jr. (2001), tittelrolla i Anna Karenina (2002), Klyteimnestra i Orestien (2003 og Oresteia (2023), Den grønkledde i Robert Wilsons Peer Gynt (2006) og Volva i Wilsons Edda (2016), Christine Mannon i Sorga kler Elektra (2012), tittelrolla i Fedra (2014), Ales i Trilogien (2019), Ranevskaja i Kirsebærhagen (2020) og Édith Piaf i Sporv og engel (2023). Ho var også del av det store teaterprosjektet Andre verdskrigen - Natt i verda (2016).

I 2015 skreiv og sette ho opp soloframsyninga Frå landevegen, basert på sin eigen familiehistorie.

Gjertrud Jynge har fått Heddaprisen for Beste kvinnelege birolle/medspelar for rollene som Christine Mannon i Sorga kler Elektra og Maria Steuber i Tida og rommet, og som Beste kvinnelege skodespelar/hovudrolle for rolla som Ales i Trilogien. Denne fekk ho også Kritikerprisen for. Ho mottok også Heddaprisen for Særleg kunstnarleg innsats for i lag med resten av ensemblet i Edda.

Ho har orså hatt fleire roller i film og TV, mellom anna: NRK-seriane Skolen og Halvbroren og Dag på TV2. Filmroller i Salige er de som tørster og Da jeg traff Jesus med... sprettert.