Sukker

Ein ung kunstnar prøver navigere utfordringane ho møter i notidas kunstverd etter at ho blir henta inn til eit museum som treng fornying. Museet ønskjer ho skal hjelpe med å endre museets andlet mot utsida sidan ho er så "tidsriktig".

Men inne på museet oppdagar kunstnaren ei opning inn til ei anna tid, og fell plutseleg bakover og inn i (for)tida. Personar og lokasjonar endrar seg, tider krasjar inn i kvarandre og blandar seg i høgt tempo. Kunstnaren sjølv blir transformert til ulike karakterar på tvers av tid, rom og kjønn.

Norsk afro-diaspora

I Sukker blir kunstnaren mediet for å undersøke tema som “tokenism” (mangfaldsalibi) og skjult historie (hidden history) i ei sjangerblandane form som beveger seg mellom satire, afro-futurisme og magisk realisme. Med parallelle tidsliner, humor, og overlappande tidssoner blir vi tatt med på ei reise gjennom historia om norsk afro-diaspora gjennom 400 år. Frå 2025 til 1681, til 1880 til 1944, til 1990, til ute av tida. Frå Kristiania til Sunnfjord til Kragerø til Nordsjøen, til ein eller annan plass langt der ute i verdsrommet. Sukker er eit fiksjonsverk inspirert av livet til faktiske personar frå den norske afro-diasporaen, m.a. Ruth Reese, Anne Brown, Kola Mangoli og Christian Hansen Ernst.

Kunstnarane bak framsyninga

Sukker er Linda Gathus første heilaftans verk som både regissør og dramatikar. Eli Mai Huang Nesse debuterer også som scenograf og kostymedesignar. Saman med Randiane Sandboe på lysdesign, komponist Emily Adomah på lyddesign og med Ingrid Askvik som ein del av det kunstnariske teamet, skal dei lage ei humoristisk, hardtslåande og visuell oppleving på Scene 2. I rolla som kunstnaren møter vi Ameli Isungset Agbota, som står i spissen for eit sterkt ensemble sett saman av Mariama Fatou Slåttøy, Gjertrud Jynge, Iselin Shumba, Natalie Bjerke Roland, Lasse Kolsrud og Khalid Mahamoud.