Emil Johnsen

Emil Johnsen (f. 1978, Oslo) voks opp i Botswana og i Oslo, og flytta så til New York og Gøteborg for å utdanne seg til skodespelar. Etter utdanninga arbeidde han i Sverige fram til 2011, og var mellom anna knytt til Dramaten i Stockholm, og hadde fleire større roller i svenske filmar og TV seriar. Han blei mellom anna lagt merke til som Morgan i den svenske klassikaren En uppstoppad hund på SVT og med hovudrollene i spillefilmane Behandlingen (2009) og Isolerad (2010). Same året blei han plukka ut til å vere Rising Star under Stockholm Film Festival. I 2011 flytta han tilbake til Oslo, og sidan har han vore knytt til Nationaltheatret og Det Norske Teatret.

Han har vore involvert i ei rad framsyningar i Kjersti Horns regi - mellom anna har han hatt tittelrolla i Jeg var Fritz Moen (Nationaltheatret/Riksteatret, 2012), og hovudrolla i Natten er dagens mor og Kaos er nabo med Gud (Nationaltheatret, 2015, 2017) - og medverka i Raskolnikov (Det Norske Teatret, 2019).

Emil Johnsen og Kjersti Horn har også inngått eit samarbeid med forfattaren Édouard Louis om å iscenesette bøkene hans: Farvel til Eddy Bellegueule (2018), Valdens historie (2018), Kven drap far min (2020) og Ei kvinnes kampar og forvandlingar (2023), alle på Det Norske Teatret.

Johnsen har hatt fleire store roller innan TV og film. Mellom anna hovudrolla i den Danske spelefilmen Kalak (2024), som han fekk strålande kritikkar for. Han hadde også rolla som Eirik i Han (2021), David i Alt det vakre (2017) , Broch i Kampen om Narvik (2022) og rolla som Brynjar i TV2-serien Blodsbrødre (2023).

Han har vore nominert til Heddaprisen som beste mannlege skodespelar i 2014 for rolla som Christopher i Det merkelege som hende med hunden den natta (Det Norske Teatret, 2014) og for rolla som Ricky i Kaos er nabo med gud i 2017. I 2020 blei han nominert til Heddaprisen for Beste mannlege skodespelar/medspelar for rolla i Raskolnikov. I tillegg var framsyninga Jeg var Fritz Moen nominert til Kritikerprisen i 2012. I 2023 vann han Heddaprisen for beste mannlege skodespelar/hovudrolle for Ei kvinnes kampar og forvandlingar.