Hans og Grete
etter eventyret av brørne Grimm
Er det lov å ete godteriet til nokon andre, dersom du er veldig, veldig svolten?
I eventyret om Hans og Grete blir barna forlatne i skogen av foreldra sine og finn ikkje vegen heim att. I staden finn dei eit hus som er laga av kaker, godteri og sukker. Dei svoltne barna byrjar ete av det smakfulle huset, men det viser seg at det er ei vond heks som bur der...
Utgangspunkt i eventyret
Regissør Charlotte Frogner har i samarbeid med ensemblet improvisert fram ei framsyning som tek utgangspunkt i Hans og Grete. Vi møter ein liten familie på tre, aleinemora Gry og barna Frans og Merethe. Dei er ein vanleg familie som er vane med å klare seg, men no gjer dei auka utgiftene alt vanskelegare for mor. Det nærmar seg jul og barna har høge forventningar. Sjølv har ho ikkje råd til å kjøpe mjølk, vaskemaskina har ryke og bilen er på verkstad.
På sengekanten fortel mor eventyret om Hans og Grete, og etter å ha overhøyrt mora fortelje om bekymringane sine til ei venninne, får Merethe ein idé. No vil ho ta med seg Frans ut i skogen, finne heksa og ta skatten hennar med seg heim så dei skal ha råd til å feira jul.
Fattigdom og svolt
Eventyret om Hans og Grete er eit av dei mest kjente folkeeventyra, med røter tilbake til mellomalderen. Vi finn ulike variasjonar av det fleire stadar i verda, men versjonen til brørne Grimm, frå 1812, er truleg den mest kjente. Eventyret tek opp i seg tema som fattigdom, svolt og barn som blir vanskjøtta. Denne nye versjonen har ei leiken tilnærming til eventyret, og tek utgangspunkt i økonomiske utfordringar mange står overfor i dag. Det er den barnlege leiken som er styrande og som viser seg å ha mykje større verdi for familien enn dei først trudde.
Framsyninga er tilrådd for barn frå 6 år.
Hans og Grete har nykomponert musikk av Eivind Nyhammer, basert på Griegs Norsk dans.
Betal det du vil*
*Du bestemmer prisen!
Frå nyttår til og med 1. mai blir heile repertoaret på Scene 3, med unntak av gjestespel, lagt inn i ein ny og annleis pristabell. Da er det du som publikummar som avgjer kva du vil betale for billetten. Vi har fleire ulike prisklassar å velje blant, og ingen vil sjekke kven som betalar kor mykje.
