I denne framsyninga kjem ein heilt tett på skodespelar Vetle Bergan gjennom kameralinsa. Framsyninga er basert på boka med same namn, og her tar forfattar Louis opp tråden frå den første romanen sin, Farvel til Eddy Belleguelle. Han reflekterer over livsprosjektet sitt med å skape seg om, å bli ein annan og å fjerne seg frå opphavet.

I ein alder av litt over tjue hadde eg skifta for- og etternamn, endra andletet mitt, gått gjennom fleire operasjonar, funne opp ein ny måte å bevege meg på, å gå på, å snakke på, og kvitta meg med den nord-franske dialekta frå barndommen.

Édouard Louis

Rått og intenst frå dusjen

Forandre seg: metode blir spelt i ein dusj og filma til ein skjerm som står på Scene 2. Regien er ved Kjersti Horn som har sett fem av Louis’ romanar i scene. Saman med scenograf Sven Haraldsson har Kjersti Horn i mange år forska i bruken av kamera i scenerommet. Gjennom ei rad framsyningar har ho testa ulike måtar dette kan gjerast på. No lar ho skodespelar Vetle Bergan framføre heile romanen Forandre seg: metode frå ein liten dusj bak scenen i kjellaren på teateret. Nokre meter unna, inne i salen på Scene 2 vil publikum sitte og få med seg det heile direkteoverført på ein skjerm.

Utanforskap og klassereise

Louis skildrar den ekstreme klassereisa han har gjort, frå oppveksten blant dei fattigaste klassane i ein familie prega av arbeidsløyse, alkoholisme, vald og undertrykking via middelklassen i ein provinsby, til dei intellektuelle miljøa i Paris og den franske og internasjonale overklassa. Å flykte frå sin eigen skjebne krev ein innsats og vilje som få har klart med same handlekraft som Louis. Han er nådelaus i utleveringa av seg sjølv, familien og omgjevnadene sine. Å vilje hemne seg på fortida er ein sterk motor i skrivinga hans, men meir enn det er det eit frigjeringsprosjekt. Likevel kjem det med ein kostnad.

Louis spør seg sjølv;

Er eg dømt til alltid å håpe på eit anna liv?

Eg skriv fordi eg trur eg nokre gonger angrar, nokre gonger angrar på at eg har fjerna meg frå fortida, nokre gonger er eg ikkje sikker på at innsatsen har tent til noko. Nokre gonger tenker eg at heile denne kampen har vore bortkasta, og at eg, ved å flykte, har kjempa for ei lykke eg aldri har oppnådd.

Kjersti Horn og Édouard Louis

Kjersti Horn har regi på dette stykket, slik ho har hatt på alle oppsetjingane av Édouard Louis ved Det Norske Teatret. Det starta med urpremieren på teaterversjonen av Farvel til Eddy Belleguelle, som blei sett opp på utestaden Jaeger før det fann vegen til Scene 3 i 2016. Sidan har ho tatt Valdens historie, Kven drap far min? og Ei kvinnes kampar og forvandlingar til scenen.

Møt: Vetle Bergan

Vetle Bergan var nyleg nominert til Heddaprisen som Beste skodespelar/hovudrolle for rolla han spelte i Arven på Nationaltheatret. No er han tilbake på sitt heimlege teater, og står aleine i Forandre seg: metode.

Les meir

Kunsten å flykte

Édouard Louis har gjort flukta til livsprosjektet sitt. I Kjersti Horns teater blir denne kampen levd på nytt. Men kan ein eigentleg flykte frå seg sjølv?

Les meir