Ein av svensk films største suksessar, blir Änglagård kalla. Filmen, som er skriven og regissert av Colin Nutley, hadde premiere i 1992 og blei sett av 1,4 millionar menneske i Sverige. Scenen der Helena Bergström og Rikard Wolff, som hovudpersonane Fanny og Zac, brasar inn i småbyidyllen på motorsykkel, har skrive seg inn i svensk filmhistorie.
Her heime i Noreg blei filmen også ein publikumsvinnar. VG sin meldar skreiv til premieren at filmen var ein «herlig, varm komedie, hvor den svenske folkesjelen har den suverene hovedrollen».
Det skulle gå i overkant av 30 år før historia fann vegen til musikalscenen.
Musikalsuksess
I 2023 hadde musikalen Änglagård urpremiere på Oscarsteatern i Stockholm. Han var skriven av Edward af Sillén og Daniel Réhn, med musikk av Fredrik Kempe. Kempe og af Sillén var også involvert i musikalen Så som i himmelen frå 2018. Ifølgje kritikarane gjekk overgangen frå det store lerretet til teaterscenen veldig bra, også denne gongen.
«Musikalen Änglagård är lätt att älska», skreiv Aftonbladet. Dagens Nyheter skreiv at musikalen var «snygg, tänkvärd och berörande». «En given publiksuccé», slo QX fast.
«Musikalen Änglagård
är lätt att älska»
Det er Ina Svenningdal og Ken-Philippe Tete som speler rollene som Fanny og Zac når Det Norske Teatret sett opp Änglagård i 2027. Foto: Eirik Malmo. Toppfoto i saken: Filmplakaten til Änglagård (1992), Memfis Film AB
Våren 2027 er musikalen klar for eit norsk publikum. Jakob Höglund er regissør og scenograf er Sven Haraldsson. I to av hovudrollene finn vi Ina Svenningdal og Ken-Philippe Tete. Svenningdal er godt etablert for musikalpublikummet i Oslo, med roller i mellom anna Frost, Into the Woods, Tolvskillingsoperaen, Once og Europavisjonar. Tete er for tida å sjå som Miss Oopsi i familiemusikalen Pippi på sirkus. No skal dei to spele den ikoniske duoen Fanny og Zac som kjem rett frå kabaretscenen i Berlin til den svenske landsbygda. Det blir ikkje eit problemfritt møte.
Kulturkrasj
Når Fanny og Zac brasar inn i kyrkja under gravferda til einstøingen Erik, og det viser seg at ho er den ukjente arvingen til herregarden Änglagård, blir livet i den vesle byen Yxared snudd på hovudet. Fanny og Zac representerer alt det den smålåtne lokalbefolkninga ikkje er. I den solfylte svenske høgsommaren har folket rundt Änglagård fått noko nytt og spanande å snakke om. Kvifor drog mora til Fanny så brått frå byen og kven er eigentleg faren hennar? Den einaste som veit svaret på det, er landsbymatriarken Rut. Ho har alt å tape på at Fanny dukkar opp i Yxared.
Änglagård er ei humoristisk og rørande forteljing der fordommar blir utfordra, relasjonar blir sette på prøve, og der overraskande fellesskap veks fram der ein minst ventar det. Det blir landleg sjarm, kulturkrasj og ein god dose drama. Musikken er skriven av ein av Sveriges store hit-makarar, teksten blir omsett til norsk av Runar Gudnason.