Å dele ei teateroppleving i lag er ein god måte å vere i lag på. Vi har mange framsyningar på programmet som kan passe for både barn og vaksne. Velkommen til oss i jula!
Snøsøstera
Snøsøstera er den perfekte framsyninga å gå på i lag med barn, barnebarn, foreldre og besteforeldre. -Til og med tenåringen vil nok synest at framsyninga er julete koseleg.
Historia frå Maja Lundes julekalenderroman ber eit vemod i seg, men rommar også ekte juleglede. Nemleg gleden over dei ein er glad i, og dei ein minnast, men som ikkje er der lenger.
Foto: Siren Høyland Sæter
«Den magiske fortellingen fyller scenerommet og kryper inn i store og små hjerter»
Foto: Siren Høyland Sæter
Snøsøstera spelar på Hovudscenen og har nydeleg scenografi inspirert av teikningane til Lisa Aisato frå boka.
Kristin Lavransdotter
Det blir sagt at ein bør leseKristin Lavransdotter tre gonger i livet. Som ung, som middelaldrande og som gammal. Kvifor ikkje oppleve den i lag med tre generasjonar i familien?
Framsyninga er ein heil dagsmarsj, men er ei verkeleg spesiell storhending å oppleve saman med andre. Sigrid Undsets storverk som teater blei nyleg omtalt som årets beste teateroppleving av NRKs kritikar, og anmeldarane har vore rimeleg unisone i si hylling av framsyninga.
Sara Khorami som Kristin Lavransdotter i lag med Preben Hodneland som Erlend.
«...et ni timer langt teatermaraton og en bragd, et nytt storverk bygd på et storverk.»
Vikla inn i blått - Dylan på nynorsk
Vil du berre høyre musikk? Og elskar du Bob Dylan? Da er Vikla inn i blått perfekt for deg og ditt følge!
Bob Dylan er musikaren og poeten som kanskje meir enn nokon andre har påverka rockemusikken. Teaterkonserten Vikla inn i blått byr på både ikoniske hits og mindre kjende songar henta frå nesten heile Dylans karriere; frå andrealbumet The Freewhelin´ Bob Dylan (1963) til den siste utgjevinga hans, Rough and Rowdy Ways (2020).
På scenen står eit songsterkt skodespelarlag klar til å levere sine tolkingar av songane til ein av musikkens og litteraturens meir mangesidige kunstnarar.
«En Dylan-konsert for historiebøkene»
«dirrende intenst»
Inn frå regnet
Kanskje er du berre lei av alt i romjula? Lei julekos, julegåver og julehysteri? Da har du ein venn i lokalpolitikar og fagrørslemann Olav Svendsen i Inn frå regnet!
I Frode Gryttens nye drama sit ein bitter gubbe i eit flaumroka hus i utkant-Noreg og er sint på alt og alle. Ikkje minst, er han sint på politikarane. Det er desember, og bygda skulle ha vore pynta til advent. I staden er alt blitt øydelagd av flaum. Heile hus har sigla vekk frå grunnmurane, liv har gått tapt. Kvifor har dei ikkje sikra betre?
Så om du er lei familien og skrikarungene - røym inn i teatermørkeret og kos deg med at også andre familiar har sitt. Med Frode Gryttens mørke humor, absurde situasjonskomikk og skarpe observasjonsevne, blir publikum vitne til eit eksistensielt kvardagsdrama i eit flaumutsett område i utkant-Noreg.
