Jours de joie / Tid for glede (FRA)

Å ønskje, å håpe, å hate, å forlate, å bli verande … Å spele Lygre er ifølgje denne oppsetjinga å stille spørsmål som set livet i samanheng. Ei mor har kalla til seg dei to barna sine for eit lite familietreff. Til denne «gledas dag» har ho valt ein kyrkjegard som møteplass. Dottera kjem, men sonen dukkar ikkje opp. Det viser seg at han har bestemt seg for å forsvinne og ikkje veit om – eller når – han kjem tilbake. Mor og dotter blir også raskt forstyrra av andre som har behov for å snakke saman. Det blir ein samtale der usemje og familiære så vel som ekteskaplege problem kjem til overflata.

Den franske regissøren og teatersjefen Stéphane Braunschweig har i mange år hatt eit nært forhold til Arne Lygres dramatikk og har sett opp fleire av stykka hans. Urpremieren på Tid for glede ved Det Norske Teatret i 2022 blei ein teatersensasjon, og denne oppsetjinga av Braunschweig ved Odéon-Théâtre de l'Europe var den andre iscenesetjinga av stykket. Regissøren og laget hans ser forfattarskapen til Arne Lygre som ei teatral utfordring som set samtida i perspektiv.

SCENESPRÅK Fransk, med engelsk teksting på scenen

MED Virginie Colemyn, Cécile Coustillac, Alexandre Pallu, Pierric Plathier, Lamya Regragui Muzio, Chloé Réjon, Grégoire Tachnakian, Jean-Philippe Vidal