Husjomfru Husjomfru

av Edvard Hoem

«Julie Hoem blir i Anne Wiigs finstemte tolking løfta til eit vakkert portrett av eit kvinneliv.»

«et bredt bilde av et liv i forsakelse»

«Bevegende fortellerteater, nennsomt iscenesatt, nydelig spilt»

Opplev siste romanen i Edvard Hoem si rike slektskrønike som teater. Ei varm, sår og høgst levande framsyning om å bli sett, og om å bli hugsa.

I 1911 døyr Julie Elisabeth Hoem på gamleheimen på Nordnes. I protokollen står det: Ingen Slegtninger. Intet Efterlatt. Likevel rommar livet hennar ei heil verd.

Basert på Edvard Hoems roman Husjomfru blir historia om felemakar Lars Olsen Hoems yngste dotter løfta fram. Julie Elisabeth var ei stolt og urokkande kvinne som levde midt i skiftet mellom gamle og nye tider, før velferdssamfunnet tok form, og då eit kvinneliv lett kunne forsvinne i stilla.

Heimløyse

Etter ungdomsår i Kristiansund arbeidde Julie Elisabeth det meste av livet som husjomfru hos velståande familiar i Bergen. Ho sat ved herskapets bord - men høyrde ho eigentleg til der? Framsyninga skildrar korleis små val, draumar om kjærleik og lengta etter tilhøyrsle kan forme eit heilt liv.

Edvard Hoems slektskrønike

Teatret Vårt har tidlegare løfta Edvard Hoems slektshistorie fram på scenen med Slåttekar i himmelen (samarbeid med Det Norske Teatret) og Jordmor på jorda. Husjomfru er ei varm og sår forteljing om ei kvinne som lenge har stått i skuggen av historia, men som av Hoem har fått si stemme og si plass i lyset.

Anne Wiig ber heile livsreisa aleine på scenen - frå svaberga i Kristiansund, til det stille rommet der livet går mot slutten i Bergen. Ei sterk, levande og nært fortald teateroppleving der éi stemme rommar eit heilt liv.

Framsyninga er eit gjestespel frå Teatret Vårt i Molde, og har spelt for fulle hus i Møre og Romsdal etter premieren våren 2026. No kjem framsyninga til Oslo.

Teatret Vårt sin podkast i intervju med Edvard Hoem på garden Hoem, huset der alle figurane i slektskrøniken har budd.

Opphavleg premiere 25. februar 2026 i Molde.
av Edvard Hoem Dramatisering Kjersti Sandal Regissør Kristian Lykkeslet Strømskag Lysdesignar Jonas P A Fuglseth Scenograf ‌‍‌‌‌‍‍‌Kristian Lykkeslet Strømskag og Jonas P A Fuglseth Lyddesignar Sindre Klykken Med Anne Wiig