I svarte skogen inne
av Jon Fosse
Ein ung man set seg i ein bil og køyrer av garde. Kor skal han? Kva vil han? I svarte skogen inne er eit heilt nytt skodespel skrive for Det Vestnorske Teateret og Det Norske Teatret.
Ein ung mann set seg i bilen og køyrer av garde, så langt han kjem, innover ein traktorveg, forbi nedlagde gardsbruk og mørklagde hytter, til han køyrer seg fast med bilen. Så får den unge mannen det for seg at han kan gå inn i den mørke skogen for å finne hjelp.
I svarte skogen inne er eit eksistensielt spenningsdrama om einsemd, lengsel, avmakt og skam. Det er ei mektig forteljing om å gå seg vill, i skogen, som i livet. For som den unge mannen seier: «Eg finn aldri fram til noko. Ikkje til bilar, ikkje til folk.»
Framsyninga er sett i scene av Miriam Prestøy Lie. Saman med scenograf Dagny Drage Kleiva og lysdesignar Arne Kambestad, lar ho stykket utspele seg i eit omsluttande scenerom. Komponist Sjur Miljeteig framfører sjølv musikken frå scenen.
Produsert av Det Vestnorske Teateret og Det Norske Teatret i samarbeid med Festspillene i Bergen.
Det visuelle uttrykket er laga av kunstnar Nikolai Torgersen