Tamino
En ung mann som sovnar i teateret. I draumen sin blir han ein ung prins som får i oppdrag frå Nattas dronning å finne dottera hennar, Pamina. Han blir djupt forelska i Pamina ved første augnekast, er modig og har ei grunnleggjande tru på kjærleiken.
Papageno
Ein relativt ung mann, ein lystløgnar med fuglar, mat og vin som primære interessar. Han drøymer om jenter og om å få seg ein kjærast, og blir meir eller mindre frivillig Taminos følgjesvenn i søken etter Pamina.
Pamina
Dottera til Nattas dronning og Fyrsten Sarastro. Djupt forelska i Tamino. Ho er ærleg og modig og har grunnleggjande tru på kjærleiken. Må navigere mellom foreldre som kranglar, ein innpåsliten beilar og kommunikasjonsutfordringar i kjærleikslivet.
Nattas dronning
Nattas herskerinne, djupt ulykkeleg over at dottera Pamina er borte. Ho legg ein plan for å få tilbake kontrollen, samstundes som ho vil øydeleggje Sarastro sitt imperium. Elskar og hatar – og fryktar – Sarastro.
Sarastro
Øvste speidarleiar og herskar i solas tempel. Elskar og hatar – og fryktar - Nattas dronning. Han har tatt dottera Pamina frå mora, fordi han meiner ho treng ein anna type rettleiing i livet.
1. og 2. prest
Speidarleiarar som jobbar for Sarastro. Trufaste mot reglane i speidarrørsla og ansvarlege for å gjennomføre prøvane Sarastro pålegg Tamino og Papageno.
Dei tre damene
Publikumsvertar på Det Norske Teatret gjennom mange år. Jobbar for Nattas dronning og har ein finger med i det meste. Dei gir Tamino og Papageno ei magisk fløyte og eit klokkespel som skal hjelpe dei på ferda mot Sarastro sitt tempel.
Dei tre gutane
Tre overmenneskelege vesen som viser Tamino og Papageno vegen til Pamina. Dei gir òg gode råd i livet.
Monostatos
Ung mann som ikkje finn sin plass i fellesskapet og slit med å få merksemd frå damene. Bortfører Pamina. Ulykkeleg, aggressiv og lettskremt.
Papagena
Engasjert publikummar på Det Norske Teatret som blir sjarmert av Papageno.