Musikal for dei som ikkje likar musikal?

Musikk, rørsle og ei sterk ensemblekjensle kjenneteiknar regien i framsyningane til Jakob Höglund. Med bakgrunn som skodespelar, dansar, koreograf og regissør, har Höglund blitt kjent for sin leikne og energiske stil som regissør og koreograf på ei rekke musikkteateroppsettingar i Norden.

Og nettopp den særeigne premissen i Once, at skodespelarane også er musikarane, skapar ein unik nærleik, varme og autentisitet. Her står musikken i fokus, og Höglund har som mål å skildre denne hjartevarme og ektefølte forteljinga berre ved hjelp av dei 16 instrumenta på scenen.
- Eg har alltid vore interessert i å undersøke musikalen som kunstform. Den andre spennande tingen med Once er at den handlar om vanlege menneske, menneske med dårleg råd som alle kjempar med ulike utfordringar i livet. Her finst ingen skurk.

Autentisiteten i framsyninga blir vidare underbygd av historias tematikk og karakteranes medmenneskelegdom; karakterane blir styrkt av å stille opp for kvarandre utan tankar om eiga vinning. På same måte ønskjer Höglund at publikum skal gå styrkt ut av teatersalen etter at dei har sett framsyninga.