Kan nokon gripe inn

  • Scene : HOVUDSCENEN
  • Varigheit : 1 time 30 min (ikkje pause).
  • Pris frå: 275 ,-
  • Premiere: 14. januar 2017

Karakterane frå Stein Torleif Bjellas låtar blir levande i vårens store musikalske satsing på Det Norske Teatret.

Vi er på ein stasjon ein stad på bygda. Dei fleste tog dundrar forbi, men det er framleis liv i stasjonsbygningen, som har sett sine beste dagar. Hit kjem dei som vil reise vekk, som vil sleppe frå, som lengtar etter at kjærasten skal komme, som søker kontakt – eller som berre vil at nokon skal gripe inn.

Stein Torleif Bjellas personar og låtar er ryggrada i teaterstykket Kan nokon gripe inn. Eit band med ein mystisk frontfigur er på veg ut i verda. Kanskje skal dei berre på spelejobb to stasjonar unna? Den unge gravide jenta, med barnevogn på slep var ein gong den mest populære. No ventar ho på han som sannsynlegvis er far til barnet i magen. Optimisten går stadig laus på nye håplause prosjekt. No er det erobringa av den gravide jenta som står for tur. Pusling har i godt vaksen alder flytta frå mor si. No søker han kontakt med andre Han ber på ein termos med to koppar. Ekteparet Sorgfrid og Hemnaren kjempar på kvar sin kant med sorga over eit barn dei mista. Han er fly forbanna, ho er på veg bort. Frå han, frå alt?

Teater med musikk

Lasse Kolsrud har skrive manus og har regi på framsyninga. Han har tidlegare, med stor suksess, skapt forteljingar om vanlege folks liv i bygde- og småbysamfunn. I Bikubesong (av Frode Grytten, dramatisert av Lasse Kolsrud) følgde vi familiane i ei blokk i sentrum av Odda. I Sånne som oss (av Frode Grytten/DNS) fekk vi innblikk i tre generasjonar i forstaden Loddefjord utanfor Bergen. I Bikubesong var det The Smiths som var lydsporet. I Sånne som oss var det John Olav Nilsen og gjengen. Denne gongen har Lasse Kolsrud fridd til ein av våre fremste visekunstnarar.

Stein Torleif Bjella

Stein Torleif Bjella har sett ord og musikk til mange lagnader i distrikts-Noreg. Sjølv har han vendt tilbake til heimbygda Ål etter nokre år i hovudstaden. Her har han for alvor slått gjennom med songar om den norske bygdesjela. Dei handlar om vanlege folk, som alle strir med sitt, og som fåmælt og famlande prøver å finne ein plass – i kjærleiken og i verda. Det er motbakkar, små og store kriser, det er umogleg kjærleik og det er lange etableringsfasar. Songane i framsyninga er henta frå albuma Heidersmenn, Heim for å døy, Vonde visu og Gode Liv, som kom ut 7. oktober.

Kjersti Dalseide og Stein Torleif Bjella i Teaterpodden!

Vi sette opp mikrofonane våre opp på Ål stasjon og inviterte sambygdingane Kjersti og Stein Torleif til ein prat om året som har gått og året som kjem! Stein Torleif fortel om kvifor han gler seg til at nettopp Kjersti er ein av dei som skal synge songane hans på Hovudscenen i vår.

LES MEIR I ARTIKLANE UNDER

OLAV BROSTRUP MÜLLER INTRODUSERER KAN NOKON GRIPE INN

I BIKUBEN: 18. MARS KL. 17.15, 22. APRIL KL. 17.15, 4. MAI KL. 19.15

Kan nokon gripe inn handlar om menneske som ønsker å reise vekk, som vil sleppe frå – eller som berre vil at nokon skal gripe inn. I 2014 gav Olav Brostrup Müller ut boka Kjedet enebolig – rapport frå provinsen. Den var basert på eigne erfaringar med å bytte ut livet på Grünerløkka med småbyliv og stjerneklare kveldar. Korleis gjekk overgangen, – og kan ein eigentleg sleppe frå? Høyr Müller introdusere framsyninga i Bikuben. Introduksjonane er gratis og du treng ikkje billett.

Ein garderobeprat

Vi tok med Pål Chrstian Eggen og podcaststudioet inn i garderoben til Kjersti Dalseide. Vi gav dei to krukker med spørsmål og lukka døra. Resultatet kan du høyre her!


Høyr musikken i framsyninga:

Kan nokon gripe inn er ein samproduksjon med Riksteatret. Turnepremieren blir på Ål Kulturhus den 11. oktober 2017 og framsyninga skal reise til heile 22 stader. Oversyn over heile turnéen med Riksteatret.