Frå 2025 inngår Det Norske Teatret, Tani Dibasey og Only Slime eit unikt samarbeid på Scene 3.
Frå januar 2025 gir Det Norske Teatrets påtroppande teatersjef, Kjersti Horn, det kunstnarlege ansvaret for Scene 3 til Only Slime og Tani Dibasey. Desse skal lage ein serie framsyningar og happeningar på teaterets minste scene. Meir om prosjektet vil bli klart når Kjersti Horn legg fram repertoaret sitt i slutten av oktober.
Tani Dibasey
Tani Dibasey (f. 1994) er både skodespelar, forfattar og regissør, utdanna ved skodespelarlinja ved Kunsthøgskolen i Oslo. Han har fått ry som ein teaterfornyar og er involvert i ei rad prosjekt både i det frie scenekunstfeltet og i institusjonsteatera. I arbeidet sitt som scenekunstnar har han fokus på å nå nye og yngre. I 2023 var han nominert til Heddaprisen for Beste mannlege skodespelar/hovudrolle for rolla som Gutten i Den 25. timen ved Den Nationale Scene.
I 2024 blei han og prosjekta han var i bresjen for, heidra med heile to Heddaprisar. Den kritikarroste framsyninga Sorte gutter gråter ikke, som han hadde regien for, blei tildelt Heddaprisen for Beste teaterframsyning. Tani Dibasey personleg blei tildelt den særs høgthengande prisen for Særleg kunstnarleg innsats. I juryens grunngjeving stod det blant anna:
… en svimlende ambisiøs visjon rundt hvordan det aller vanskeligste og mest private kan foredles som bred scenekunst rettet mot et publikum vi sjelden ser i teateret.
Only Slime
Bak Only Slime står kunstnarduoen Tobias Pfeil og Claudia Cox. Dei to starta samarbeidet i 2022, og omtalar Only Slime som eit multikunstnarleg musikk- og digital kunst-prosjekt. Dei blandar element frå ulike visuelle kunstsjangrar, musikk, speldesign, KI-assistert kunst, performance, installasjonar og 3D-animasjon. Dei fokuserer på overskridingar og innovasjon, med vekt på interdisiplinært samarbeid. Dei debuterte som duo i 2022 med dataspel-operaen Afterlife.
Tobias Pfeil (f. 1992, Oslo) er komponist og digital mediekunstnar med utdanning mellom anna frå Hochschule für Musik und Theater Hamburg, Hochschule der Künste Bern og Rytmisk Musikkonservatorium i København.
Claudia Cox (f. 1991, Australia) er fiolinist og komponist med utdanning frå Griegakademiet i Bergen og konservatoriet i Newcastle, Australia.
