I Jonas Hassen Khemiri sin suksessroman frå 2023 møter vi altså Jonas, som har same namn som forfattaren, same opphav, bustad, eigenskapar – ja – det er vel ikkje heilt enkelt å skilje fiksjon frå realitet. At det er mange overlappande trekk med forfattaren, er sikkert. Også mellom Nader og Jonas.
- Han graviterer mot dei tre søstrene som flyttar inn i lokalmiljøet med ein styrke som er forståeleg. Jonas kjenner sterkt på ei tilhøyrsle, eit fellesskap og noko som liknar han sjølv i dei tre jentene. Dei har, i likskap med han, bakgrunn frå Tunisia. Det er jo gjerne slik vi menneske er, at vi blir dratt mot det som resonnerer i oss sjølve. Eg har også slike trekk. Særleg om eg støyter på folk som har karakteristikkar som eg har kjent meg åleine om å ha.
Frodig oppvekstskildring
I Søstrene møter vi Ina, Evelyn og Anastasia som plutseleg dukkar opp i kvardagen til Jonas. Publikum følgjer desse fire frå dei er ungar, gjennom ungdomstida og fram til i dag.
Søstrene Mikkola flyttar inn i nærmiljøet til forteljaren Jonas. Frå venstre Evelyn (Natalie Bjerke Roland), Ina (Elpida Stojcevska) og Anastasia (Hibba Najeeb). Foto: Lars Opstad.
Vi startar i 1980-åra. Det er referansar til historiske hendingar, millenniumsfesten og koronapandemien. Det er kjærleiksaffærar, familietrøbbel, lojalitet og identitetssøking. Og det går føre seg både i Stockholm, Tunisia, Tyskland og New York. Ein rik roman med store tidssprang og geografiske avstandar. Som no altså har blitt teater i ei langt meir fortetta form.
- Det er jo gjerne slik vi menneske er, at vi blir dratt mot det som resonnerer i oss sjølve.
- Det er ei oppvekstskildring med eit frodig persongalleri. Eg trur forfattaren, eller kanskje det berre er forteljaren Jonas, har tillagt karakterane spor av sine eigne tankar, kjensler og erfaringar. Kanskje dei tre søstrene eigentleg berre er tre delar av han sjølv. Og at Evelyn er den av søstrene som set mest presist ord på dei tankane han ber på. Det er kanskje derfor han er mest fiksert på henne. Det er jo ei form for søking etter identitet som gjennomsyrer heile forteljinga. Men som blir fortald i ei dialogdriven, kjapp og nokså gatesmart form.
Kjent frå TV-ruta
Nader Khademi er eit velkjent fjes for dei fleste nordmenn. Han har vore ein etterspurd skodespelar etter at han gjekk ut frå skodespelarlinja på Kunsthøgskolen i Oslo i 2011. Det er kanskje særleg på TV-skjermen han har blitt lagt merke til. I Jordbrukerne var han glitrande som Marwan, ein av fleire menn som flytta til idylliske Telemark for drive lyssky verksemd under dekke av å drifte ein gard.
Einar Førde (Nader Khademi) fekk innvandrarbakgrunn og snakka austlandsk i Makta. Dette var eitt av fleire kontroversielle grep som blei diskutert i samband med snakkis-serien. Kathrine Thorborg Johansen spelte Gro Harlem Brundtland. Foto: NRK/Motlys.
Men det var som Einar Førde i den kritikarroste serien Makta at merksemda tok av. Energien, særtrekka og tonen i karakteren blei løfta fram. Men mange i heimtraktene var også skaka over at Førde ikkje snakka nynorsk, han som var målmann på sin hals. Nader Khademi er fast tilsett på Nationaltheatret. At han skulle kome til å gjere ei rolle på nynorsk, var det ikkje berre han som tvilte på.
Fekk fritak frå nynorsk
- Vi innvandrarar får jo valet om å ta sidemål på skolen. Da seier jo ein skolelei ungdom at da tar jeg heller og venter på dere der ute. Og så vel eg sjølvsagt det einaste yrket i verda som treng nynorsk!
Oddsa for at han einaste som venta på utsida også skulle bli den einaste i venneflokken som skulle få bruk for den undervisinga var med andre ord høge. Og noko Nader kan le høgt av i dag.
- Ingen av dei andre har vore i nærleiken av EG og IKKJE. Men eg som sat på huskene utanfor klasserommet, eg skal få bruk for det.
No må eg berre gå all in
- Ingen av dei andre har vore i nærleiken av EG og IKKJE.
Grunnen til at han takka ja til rolla låg heller ikkje i det språklege. Men sjansen til å få jobbe med regissør Maren Bjørseth og dei andre som er knytt til produksjonen var for freistande.
- Maren Bjørseth har utruleg god smak, det gjer meg trygg. Det er herleg å jobbe med folk som du stoler på har god smak. Da kan eg fokusere utelukkande på mitt eige. Så er ho genial på sitt felt. Ho er lite stressa og har god oversikt.
Kunne ikkje seie nei
Sjølv må Nader konsentrere seg om å få Jonas-karakteren under huda, få ei stor og ikkje-kronologisk historie over scenekanten og halde tunga beint i munnen når han skal styre framdrifta i forteljinga om dei tre ulike søstrene.
- No må eg berre gå all in. Det er generelt heilt fantastisk å vere her på Det Norske Teatret. Eg er stor beundrar av Kjersti Horn, så det var berre heilt umogleg å takke nei til dette tilbodet. Som eg rett nok aldri hadde sett for meg, seier Nader Khademi med ein latter.
Og tenker kanskje på den manglande nynorskundervisninga på skolen.
Nader Khademi delar scenen med dyktige kollegaer. Her i sminken med Ane Dahl Torp som m.a. spelar mor hans, bak han sit Elpida Stojcevska som spelar den eldre søstera Ina. Foto: Ole Herman Andersen
Intervjuet er publisert 10. september 2026.