Noregspremiere 12. februar kl. 19:00 på Scene 2
Med noregspremiere på Blendverk presenterer Det Norske Teatret ein av Storbritannias mest framståande dramatikarar. Abi Morgan har skrive både for teater og fjernsyn og m.a. skrive filmmanus til romanar av Monica Ali og Zadie Smith.
Blendverk er eit intelligent og utfordrande stykke som grip rett inn i vår urolege samtid: Fire kvinner er samla i ein luksusheim. Utanfor er eit totalitært regime i ferd med å kollapse. I ein atmosfære av uuthaldeleg spenning og indre uro tvingar politiske, personlege og eksistensielle konfliktar seg til overflata. Utanfor rasar ein krig, inne blir eit blendverk av livsløgner skrelt bort.
Stykket blir sett i scene av Torkil Sandsund, som tidlegare har sett opp to kritikarroste stykke på Det Norske Teatret, Tvillingar av Agota Kristof (2007) og Så blir det stilt av Arne Lygre (2009). På scenen i Blendverk står fire sterke damer: Heidi Gjermundsen Broch, Ingunn Øyen, Nina Woxholtt og Ingrid Jørgensen Dragland. Scenografi er ved Helge Hoff-Monsen, video ved Raymond Stubberud og lyd ved Torkil Sandsund.
Dersom du ønskjer å gjere intervju med regissør eller skodespelarar, eller ønskjer pressebillettar til framsyninga, ta kontakt med Ida Michaelsen på telefon 22 47 38 30 eller på e-post ida@detnorsketeatret.no
|
